ໃນວັນທີ 27 ກັນຍາ ​ເວ​ລາ 09:00ໂມງ, ກົມຄື້ນຄວາມຖີ່​ວິທະຍຸສື່ສານ ໄດ້ຈັດຝຶກອົບຮົມຜ່ານລະບົບທາງໄກຮ່ວມກັບອົງການ​ຄື້ນຄວາມ​ຖີ່, ກະຊວງຖະແຫຼງຂ່າວ ແລະ ການສື່ສານ, ສສ ຫວຽດນາມ ໃນການຝຶກອົບຮົມຄັ້ງນີ້ໃຫ້ກຽດເຂົ້າຮ່ວມເປັນປະທານເປີດການຝຶກອົບຮົມໂດຍທ່ານ Le Van Tuan  ຫົວໜ້າອົງການ ​ຄື້ນຄວາມ​ຖີ່, ກະຊວງຖະແຫຼງຂ່າວ ແລະ ການສື່ສານ, ສສ ຫວຽດນາມ ແລະ  ທ່ານ ໄຊລືຊາ ອິນສີຊຽງໃໝ່ ຫົວໜ້າກົມຄື້ນຄວາມຖີ່ວິທະຍຸສື່ສານ, ກະຊວງ ຕສ ພ້ອມດ້ວຍຄະນະ ແລະ ຄະນະພະແນກ, ວິຊາການເຊິ່ງມີຜູ້ເຂົ້້າຮ່ວມຝຶກອົມຮົບທັງໝົດ 15 ທ່ານ, ຈາກບໍລິສັດດາວທຽມລາວເອເຊຍ -ປາຊີຟິກ ຈຳກັດ ຈຳນວນ 02 ທ່ານ. ການຝຶກອົບຮົມຄັ້ງນີ້ ຈັດຂຶ້ນໃນລະຫວ່າງວັນທີ 27 -30 ກັນຍາ 2022 ເປັນເວລາ 04 ວັນ.

       ຫົວຂໍ້ການ​ຝຶກ​ອົບຮົມ​ໃນ​ຄັ້ງ​ນີ້​ເປັນວຽກງານໜຶ່ງທີ່ມີຄວາມໝາຍຄວາມສຳຄັນຫຼາຍຕໍ່​ກັບການ​ພັດທະນາ​ວຽກງານ​ການສື່ສານ​ຜ່ານ​ດາວ​ທຽມຂອງ ສປປ ລາວ ແລະ ເພື່ອໃຫ້ພະນັກງານກົມຄື້ນຄວາມຖີ່ວິທະຍຸສື່ສານມີ​ຄວາມເຂົ້າໃນວຽກງານການສື່ສານຜ່ານດາວທຽມເປັນຕົ້ນຮຽນຮູ້ການຄົ້ນຫາຂໍ້ມູນດາວທຽມໃນເວັບໄຊທ໌ຂອງ ITU, ພື້ນຖານການນຳໃຊ້ ໂປຣແກຣມ ITU ກ່ຽວກັບວຽກງານອາວະກາດ ເຊັ່ນ: SpaceCap, GIMS, ຮຽນຮູ້ໂຄງສ້າງເອກະສານຂອງຂໍ້ມູນດາວທຽມ (filing), ພື້ນຖານການຄິດໄລ່ຄ່າສຳຄັນຕ່າງໆຂອງດາວທຽມ ເຊັ່ນ: PSD, EIRP, Gain ເປັນຕົ້ນ ໃນການສ້າງ filing ແລະ ການອອກແບບລະບົບເຄືອຂ່າຍດາວທຽມສຳລັບການສະ ເໜີຂໍ filing   ໃໝ່ ເພື່ອຢື່ນຕໍ່ອົງການ ITU ​ ​ຕາມ​ລະບຽບຄື້ນຄວາມ​ຖີ່​ວິທະຍຸ​ສື່ສານ​ສາກົນ (RR).

ຂ່າວໂດຍ: ວິໄລຈິດ ພັນລັດດີ